来源：魔都白领群
原创：薛理勇
沪语改写：郭莉
(资料图片仅供参考)
讲述：安娜
文字、语音审核：丁迪蒙
编辑：王乙其
上世纪八、九十年代，我工作单位勒沪西虹桥路，屋里倒勒沪东虹口，我每天踏脚踏车上下班。因为从事上海史研究，我蛮欢喜上海个历史建筑。就利用脚踏车个便利，走街串巷寻当年上海老房子。可惜，当时呒没钞票买照相机，呒没留下来照片资料。
淮海西路338号，就是番禺路口西面，有一栋老洋房，1947年出版个《上海市行号路图录》里向，此地标注个是“C. S. Franklin住宅”。
迭个C. S. Franklin，一般侪通译为“弗兰克林”，其实迭个老兄有伊自家取个中文名字，叫樊克令。
樊克令是美国人。1892出生，1913年美国密西西比大学毕业，有文学士搭仔法学士两只学位。1917到1918年，勒夏威夷总督府做助理检察长。一战之后，伊是夏威夷第一法庭首席法官。1959年过世。
1921年秋，樊克令来中国，搭人家佮办了律师事务所。1932年又跟哈灵顿佮伙，开了“樊克令哈灵顿律师事务所”，事务所长期地址勒勒圆明园路149号沙弥大楼里向。樊克令精通法典，善于辞令，还会得讲一口比较流利个汉语，所以工作起来得心应手，成为旧上海最著名个律师之一。
因为樊克令个出众才华搭仔杰出表现，1934年，伊当选上海公共租界工部局董事，第二年连任，1936年又当选为副总董，1937年4月当选为总董，还连任了三年，一直到1940年离任。迭段辰光，齐巧就是抗日战争爆发，上海沦陷个“孤岛时期”。作为公共租界工部局总董，樊克令必须维持租界尊严，搭气焰嚣张个日本人交涉、周旋，还要为中国人讲话。
上海沦陷之后，大量中国难民逃进租界，租界个治安以及正常生活出现了交关新个问题；八一三淞沪战争期间，日军炮弹歇勿歇落到租界边缘，甚至直接落到了租界里向。樊克令代表工部局搭日本人交涉，还充当中国政府搭仔日本军方个私下调解人，伊个名字经常见诸报端，樊克令因此也成为上海近代史浪最有名个工部局总董。当时中文报刊侪是用伊个汉名——樊克令，所以我认为，现在各种著录应该用“樊克令”，而勿应该再另外翻成“弗兰克林”。
1941年底太平洋战争爆发之后，樊克令拨日军囚禁，战后，伊继续勒勒上海当律师，还当选为上海美国商会会长，是上海个美侨领袖。同时，国民政府还请伊担任过行政院顾问、上海市政府咨询委员会委员。1949年以后，樊克令回国了。
樊克令个住宅，大约摸是1931年建造个。由上海美商哈沙德洋行设计，主建筑坐北朝南，两层砖木石混合结构。主立面是使用6根塔司干柱支撑个通层敞廊，正门勒中轴线浪；门楣雕花精美，用爱奥尼亚柱式支托，半圆拱门上方，是中间为半圆，两侧为方形个玻璃窗；屋顶是平缓个四坡平瓦顶，有用来通风个屋顶窗，也就是上海人所讲“老虎窗”。勒上海众多个花园洋房里向，伊一勿耀眼，两勿出众。但是，交关建筑师搭仔建筑史学者侪认为，迭个是上海为数勿多个，甚至是独一无二个美国南方庄园式殖民地建筑，所以备受关注，属于上海市第一批公布个优秀历史建筑。
1941年太平洋战争爆发之后，搿搭一埭路里侪拨日军占据，抗战胜利之后再由业主收回。不过，勒勒以后个新闻报道里向，就看勿见关于樊克令个报道了，搿幢所谓“樊克令住宅”，实际浪是归中央银行俱乐部使用个。
五十年代由部队接管，现在是空军四五五医院，除脱所谓“樊克令住宅”以外，边浪向个建筑侪老里八早拆光了，造了有廿多层高个医疗大楼。
作者：薛理勇
讲述：安娜
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
来源：“海上梦叠”公众号
关键词：
